Bəzi reseptlərdə dərmanların qiyməti 400 manata yaxındır
Deputatların əksəriyyəti problemləri və şikayətlərini dilə gətiriblər
Parlamentdə dərmanlarla bağlı problemlər qaldırılıb. Çıxış edən deputatların əksəriyyəti dərmanların qiymətləri və çatışmazlığı ilə bağlı şikayətlərini dilə gətiriblər. Milli Məclisin Səhiyyə komitəsinin sədri Əhliman Əmiraslanov bildirib ki, təkcə dərmanların qiyməti yox, eləcə də keyfiyyəti, əlçatanlığı və bu sahədə olan digər problemlərlə bağlı Səhiyyə Nazirliyi və hökumət birlikdə sənəd üzərində iş aparır. Deputat deyib ki, sənədin yaxın vaxtlarda qəbul ediləcəyi gözlənilir: “Sənədin hazırlanması ilə bağlı işlər artıq başa çatmaq üzrədir. Güman edirəm ki, yaxın vaxtlarda belə sənədi görəcəyik. Bununla da dərman vasitələri ilə bağlı mövcud olan problemlərin həlli nəzərdə tutulur”.
"Vətəndaş niyə yaxşı aptek axtarır?"
Deputat Razi Nurullayev qeyd edib ki, dərmanların qiyməti baha olmaqla bərabər keyfiyyətsiz və təsirsizdir: “Alman, ingilis aptekləri var, dərmanlar bu apteklərdə daha baha qiymətədir. Vətəndaş niyə yaxşı aptek axtarır? Niyə bir aptekdə eyni tərkibli dərman 10 manata, digərində 100 manata satılır. Mən alman, ingilis apteklərinin olmasına qarşı deyiləm, vətəndaşların aldadılmasına qarşıyam. Yeri gəlmişkən, Qida Təhlükəsizliyi Agentliyi bu yaxınlarda məlumat yaydı ki, filan kolbasalarda ümumiyyətlə, ət yoxdur. Bu nə biabırçılıqdır? Dərman sahəsində də belə biabırçılıqlar aradan qaldırılmalıdır”.
"Almaniyada 5 avro olan dərman necə 150 avro ola bilər?"
Parlamentin Regional məsələlər komitəsinin sədri Siyavuş Novruzov nəzərə çatdırıb ki, elə dərmanlar var ki, Almaniya ilə müqayisədə 20 dəfə baha satırlar: “İki, üç dəfə qiymət baha olsa, haradasa başa düşmək olar. Ancaq Almaniyada 5 avro olan dərman necə 150 avro ola bilər? Dərman gətirən, satan, yoxlayan ayrı olmalıdır. Görürsən ki, bizdə dərman gətirən, ekspertizasını keçirən və aptekə verən də eyni adam olur. Bəzən dərman zavoduna belə sifariş verirlər ki, dərmanın tərkibi aşağı olsun, qiyməti ucuz olsun. Buna görə də dərmanların keyfiyyəti olmur. Digər tərəfdən, insanların xaricdən müalicələri üçün dərman gətirməsinə maneələr də aradan qaldırılmalıdır. Qoyun insanlar müalicələri üçün dərmanlar gətirsinlər. Türkiyədə belə bir praktika var ki, Səhiyyə Nazirliyi nümayəndəsi adi geyimdə girib hər hansı bir aptekdən dərman alır. Və yoxlama aparır. Nəticə pis olanda həmin apteklər bağlanır. Həmin praktika bizdə də tətbiq olunmalıdır. Belə olarsa, vaxtı keçmiş dərmanların satışının da qarşısı alınar".
"TƏBİB-ə düşmək isə kosmosa düşmək kimi bir şeydir"
Deputat Fəzail Ağamalı da deyib ki, dərman vasitələrinin qiymətlərinə əlçatanlığın olmaması problemi var: “Belə problem var, bu, reallıqdır. Burada bazar iqtisadiyyatı, dərman gətirən və satanların maraqları, o cümlədən möhtəkirlər var. Dərmanlara nəzarəti mərkəzi icra strukturlarının birinə həvalə etmək olar. İndi bilmir ki, bu dərman məsələsinə Səhiyyə Nazirliyi, yoxsa başqa qurum baxır. Əvvəllər məsələlərə təkcə Səhiyyə Nazirliyi baxırdı, indi müraciət edirsən, deyir ki, o məsələyə TƏBİB baxır, ora düşmək isə kosmosa düşmək kimi bir şeydir”.
"Sahibkarlar dərmanları konkret bir ölkədən gətirirlər"
Deputat Vüqar Bayramov bildirib ki, keçən il hökumət dərman alınmasına 505 milyon manat xərcləyib və bu, dərman vasitələrinə ayrılan vəsaitin 2 dəfə artdığını göstərir: “Dərmanların qiymətinə idxal prosedurlarının asanlaşdırılması da təsir göstərə bilər. Dərmanların qiymətinin tənzimlənməsi mexanizminin təkmilləşdirilməsinə də ehtiyac var. Bəzi hallarda dərmanların qiyməti düzgün tənzimlənmədiyi üçün sahibkarlar dərmanları konkret bir ölkədən gətirirlər”.
"Dərman düzəldən laboratoriyalar da yoxa çıxıb"
Deputat Etibar Əliyev Azərbaycanda apteklərin alman, türk və göbələk kimi artan yerli apteklərə bölündüyünü söyləyib: “Alman və türk apteklərindən dərman alanda soruşuruq ki, keyfiyyəti nədir? Yeri gəlmişkən, dərman düzəldən laboratoriyalar da yoxa çıxıb. Əvvəllər xəstələr bir-iki qutu dərmanla müalicə olunurdusa, indi 4-5 qutu dərmanla müalicə olunmalı olurlar. Dərmanların ekspertizası barədə məlumat bazası geniş olmalıdır”.
"Türkiyədə azərbaycanlılar var, dərman istehsal edir, Türkiyədən xaricə də satırlar"
Deputat Qənirə Paşayeva hesab edir ki, inhisarçılığa son qoyularsa, rəqabət yaranarsa, dərmanların qiyməti də ucuzlaşacaq: “Səfərə gedəndə tanıdığımız insanlar zəng edirlər ki, müalicə üçün filan dərmanı gətirin, çünki Azərbaycanda qiyməti çox bahadır. Yeri gəlmişkən, bəzi əlillərimizin müalicəsi davam etdiyi və hələ əlillik dərəcələri almadığı üçün müalicə etməyə dərmanlar alırlar. Onların əllərindəki bəzi reseptlərdə dərmanların qiyməti 400 manata yaxındır. Bu məsələnin də həllinə diqqət yetirilməlidir. Bir məqamı qeyd edim. Türkiyədə azərbaycanlılar var, dərman istehsal edir, Türkiyədən xaricə də satırlar. Bu insanlar niyə Azərbaycanda belə dərman istehsalı yarada bilmirlər?”.
"İran dərmanının tərkibində narkotik olub"
Deputat Hikmət Babaoğlu idxal olunan dərmanların tərkibinin yenidən yoxlanılmasını təklif edib: “Bir vaxt İran dərmanlarından istifadə edən bir qohumumuzun Moskvada yoxlanılması zamanı məlum olmuşdu ki, İran dərmanının tərkibində narkotik olub. Ona görə idxal olunan dərmanlar yoxlanılmalıdır”.
