"İnnovasiya və Təchizat Mərkəzi" Publik Hüquqi Şəxsi Hemofiliya xəstəliyi üçün 702 min 505 manatlıq dərman vasitələri alacaq.
Teleqraf xəbər verir ki, qurum bunun üçün "Avromed Company" Qapalı Səhmdar Cəmiyyəti ilə müqavilə bağlayıb.
Müqavilənin dəyəri 702 505 AZN-dir. Sözügedən dərmanların alınmasına ötən ayın 17-dən start verilib. Müqavilənin şərtlərinə əsasən, proses ilin sonunadək davam edəcək.
Xatırladaq ki, "İnnovasiya və Təchizat Mərkəzi" Publik Hüquqi Şəxsi bundan əvvəl də "Avromed Company" QSC-dən Hemofiliya xəstəliyi üçün 3 müqavilə üzrə toplam 31 milyon 879 min 972 manat dəyərində dərmanlar satın alıb.
İndiyə qədər Mərkəzin QSC ilə bağladığı ən bahalı müqavilə isə Şəkərli diabet xəstəliyi üzrə tədbirlər ilə bağlı xərclər çərçivəsində inyeksion şəkərsalıcı və oral hipoqlikemik dərman vasitələrinin alınması olub. Bunun üçün tərəflər arasında 51.214.262 AZN-lik razılaşma əldə olunub. Müqaviləyə görə, müvafiq işlərin icrasına aprelin 22-dən başlanılıb, bu ilin dekabrına qədər bitməyi planlaşdırılır.
Onu da qeyd edək ki, "Avromed Company" Qapalı Səhmdar Cəmiyyətinin qanuni təmsilçisi İskəndərov Kamran İnqilab oğludur. Şirkətin nizamnamə kapitalı isə 57 000 manat təşkil edir.
Professor Adil Qeybulla “Sherg.az”a açıqlamasında bildirdi ki, Hemofiliya irsi, yəni genetik mənşəli bir xəstəlikdir:
“Bu xəstəliyi daşıyan şəxslərdə qanın laxtalanma sisteminin bəzi faktorları, xüsusilə VIII və IX faktorların çatışmazlığı və ya olmaması müşahidə olunur. Nəticədə laxtalanma prosesi pozulur. Bu səbəbdən hemofiliyalı şəxslərdə əzələdaxili, oynaqdaxili və daxili orqanlara spontan qanamalar baş verir. Xarici travmalar zamanı yaranan qanaxmalar isə çətin dayandırılır və bəzən həyati təhlükə yarada biləcək fəsadlarla nəticələnir. Hemofiliyalı xəstələr yüksək risk qrupuna daxildir. Bu şəxslərdə spontan qanamalar, travma və ya müdaxilə nəticəsində baş verən daxili qanamalar, peritonarxası sahəyə yayılan hematomalar olduqca təhlükəli klinik vəziyyətlər yarada bilər. Bu baxımdan daimi tibbi nəzarət və davamlı terapevtik dəstək tələb olunur. Hemofiliya üç əsas formaya ayrılır: A, B və C. Bu təsnifat laxtalanma faktorlarının çatışmazlıq növünə əsaslanır. Xəstəliyin ağır formalarında qanamalar tez-tez və intensiv şəkildə baş verir və çox zaman yanaşı gedən digər xəstəliklər (komorbid vəziyyətlər) ilə müşayiət olunur.
Bu xəstələr üçün spesifik dərman vasitələri mövcuddur və həmin preparatlar dövlət tərəfindən təmin olunur. Hemofiliyalı xəstələr ölkə üzrə mərkəzləşdirilmiş qeydiyyata alınır və dərman təchizatı bu uçot əsasında tənzimlənir. Xəstələrin sayı və dərman ehtiyacları müəyyən dövrlərdə aparılan qeydiyyat və analiz nəticəsində müəyyən edilir”.
