“Mütləq mənada bugünkü dünya güclərinin oturub danışmağa ehtiyacları var”
“NATO-nun sammitində strateji plan qəbul olundu, burda da əsas rəqib olaraq Çin və Rusiya göstərildi”
Rusiya Prezidenti Vladimir Putin Xarici İşlər Nazirliyinin Kollegiya iclasında çıxış edib. O qeyd edib ki, NATO Rusiya ilə qarşıdurmanı artırır. O bir müddət əvvəl Rusiya diplomatlarının alyansa üzv olan ölkələrdən deportasiya edilməsinə baxmayaraq, artıq əməkdaşlıq etməklə bağlı bəzi siqnalların verilməkdə olduğunu bildirib. V.Putin həmçinin NATO-nun infrastrukturlarını Rusiya sərhədlərinə yaxınlaşdırdığını nümayiş etdirdiyini, dialoqun bütün mexanizmlərini təşəbbüskarlıqla sındırdığını vurğulayıb. Və NATO-nun Rusiya sərhədləri boyunca fəallıqlarına rəsmi Moskvanın cavab verəcəyini diqqətə çatdırıb.
Rusiya - NATO gərginliyini “Sherg.az”a şərh edən Milli Strateji Təhqiqatlar Mərkəzinin sədri, politoloq Natiq Miri bildirib ki , NATO-nun təhdidlərini müəyyən mənada Rusiyanın aqressiv davranışlarına adekvat cavab kimi dəyərləndirmək olar:
“Birtərəfli qaydada NATO-nun Rusiya əleyhinə yürütdüyü starteji bir xətt var. Bu da rəsmi Moskvanın tamamilə əhatə olunması və çevrələnməsindən ibarətdir. Ukraynada inqilabdan sonra qərbyönümlü hakimiyyətin iqtidara gəlməsi rəsmi Moskva üçün çox arzuolunmaz bir vəziyyət yaradıb. Artıq Ukrayna vasitəsi ilə NATO, demək olar, Rusiya sərhədlərindədir. Paralel olaraq Ukraynanın yerləşdiyi Qara dəniz ekvatoriyasında paralel olaraq, Gürcüstanın Qara dənizlə həmsərhəd ekvatoriyasında da zamanla hərbi təlimlər keçirilir. Ona görə də zaman-zaman adekvat addımlar atılır. Polşa ilə Belarus sərhəddində baş verən hadisələr də bu gərginliyin tərkib hissələrindən biridir. Üzdə Lukaşenkonun rəhbəri olduğu Belarus olsa da, arxa səhnədə prosesin məhz Rusiya tərəfindən tətikləndiyini hər kəs bilir. NATO bu yöndə həyəcan təbili çalır. Şərqi avropaya ola biləcək hər hansısa bir təhlükənin qarşısını almaq üçün müəyyən adekvat addımlar atır. Eyni zamanda bu gün Rusiya Ukraynanın sərhədlərində yüz minə yaxın qoşun toplayıb. Minlərlə tank və digər texnikaları da toplamaqla Ukrayna, Böyük Britaniya təhlükəsi yaradıb”.
N.Miri artıq bu yöndə ABŞ-ın NATO rəhbərliyi ilə danışmağa başladığını və bütün bunların NATO Rusiya əməkdaşlığının hələ də gərgin müstəvidə inkişaf etməsinin göstəricisi olduğunu söyləyib:
“Mütləq mənada bugünkü dünya güclərinin oturub danışmağa ehtiyacları var. Bilirsiniz ki, NATO-nun sammitində strateji plan qəbul olundu, burda da əsas rəqib olaraq Çin və Rusiya göstərildi. ABŞ-ın bu yöndəki siyasəti ondan ibarətdir ki, stabilləşdirici və praqnozlaşdırıla bilən bir Rusiya ilə əməkdalıq qursun. Ancaq bu gün Rusiya praqnozlaşdırıla biləcək bir ölkə deyil.
Çünki rəsmi Moskvanın Ukraynanın tərkib hissəsi olan Krımı, Svestopolu eyni zamanda cənub-şərq əyalətində Luqansk və Donbasın bir hissəsini işğal etməsi unudulmayıb. Ayrıca Donbası işğal etmək planı hələ də Rusiyanın masasındadır. Bütün bu təzyiqlər qarşılıqlı zaman-zaman ona görə edilir ki, qarşı tərəf bu təzyiqdən geri çəkilərək öz maraqlarında güzəştə getsin. Ancaq hələlik biz nə birtərəfli, nə də qarşılıqlı qaydada bunu görmürük”.
Politoloq çox sürətlə bu güc mərkəzlərinin dünyanı böyük bir təhlükəyə doğru apardıqlarını vurğulayıb:
“Hazırada bu proses Suriyada da, Liviyada da belədir. Liviyada həll olunmayan ciddi bir hakimiyyət məsələsi, Ukraynada Rusiya təcavüzü təhlükəsi hökm sürür. Cənubi Qafqazda stabillik yoxdur.
Ermənistan-Azərbaycan sərhəddində hərbi gərginlik hələ də davam edir. Bu prosesin arxasında yalnız Azərbaycanla rəsmi İrəvanın düşmənliyi durmur. Bu regionda qlobal güclərin geosiyasi maraqlarının bilavasitə toqquşduğunu göstərir. Buna görə də biz Rusiya NATO münasibətləri dedikdə əslində iki güc mərkəzinin regional səviyyədə müxtəlif geosiyasi maraqlarının qarşı-qarşıya durduğunu da nəzərə almalıyıq. Rusiya və NATO arasındakı münasibətlər yaxın perspektiv üçün müsbət mənada heç nə vəd etmir. Əksinə qarşıdurma zaman keçdikcə artır, bu da yeni müharibə təhlükəsini gündəmə gətirir . 16 Noyabr tarixində bir günlük də olsa Ermənistan-Azərbaycan sərhəddində ciddi əməliyyatlar prosesi yaşandı. Eyni mənzərəni biz sabah Ukrayna sərhəddində Lonbasada da Belarus-Polşa sərhəddində Pribaltika ölkələri ilə Rusiya sərhəddində də görə bilərik.
Bu təhlükələr hər zaman mövcuddur. Bu gün Aralıq dənizində çox ciddi bir qarşıdurma var. Artıq bəlli etmək olmur ki, dünyada kim-kimə qarşıdır. Türkiyə əslində NATO üzvü olmaqla bərabər eyni zamanda strateji müttəfiqi olan ABŞ tərəfindən ciddi iqtisadi sanksiyalara məruz qalır. Bu gün Türkiyə Suriyanın şimalından tutmuş Aralıq dənizi hövzəsindəki ölkələrə qədər ABŞ-ın Türkiyəni çevrələmək siyasəti ilə üz-üzədir”.
Hazırda dünyada mövcud olan gərginlik müstəvisinin böyük müharibələrin başlamasına təhlükə yaratdığını deyən politoloq bu güc mərkəzləri arasında anlaşma olmadan dünyada sülhün, stabilliyin əlçatan olmayacağını diqqətə çatdırıb.
