Ağdam rayon Birinci Yüzbaşılı kənd tam orta məktəbin 10-cu sinif şagirdi təhsil müəssisəsində nizam-intizam qaydalarına əməl etməyib, müəllimlərə qarşı uyğunsuz davranış nümayiş etdirib.
Bu barədə Teleqraf-ın sorğusuna cavab olaraq Qarabağ Regional Təhsil İdarəsindən məlumat verilib.
"Təhsil müəssisəsində sağlam emosional mühitin gücləndirilməsi məqsədilə rayon təhsil sektoru tərəfindən şagird, valideyn və müəllimlərlə söhbət aparılıb, nizam-intizam qaydalarına əməl edilməsinin vacibliyi vurğulanıb. Sözügedən məktəblinin tədris prosesindən uzaqlaşdırılması ilə bağlı yayılan görüntülər bir neçə gün bundan əvvəl lentə alınıb. Şagird hazırda dərslərdə iştirak edir", - deyə məlumatda vurğulanıb.
Qeyd edək ki, mediada sözügedən məktəb şagirdinin direktor tərəfindən bir həftə ərzində dərsə buraxılmadığını əks etdirən görüntülər yayılıb.
Mövzu ilə bağlı Sherg.az-a danışan təhsil eksperti Elçin Əfəndi bildirib ki, məktəb rəhbərliyinin şagirdi dərsə buraxmamaq kimi bir ixtiyarı yoxdur:
“Yalnız həqiqətən də şagirdin dərsi pozduğu və təhsil müəssisəsinə ziyan verdiyi halda buraxmaya bilər. bu zaman da həmin şagirdin islahıyla bağlı təhsil müəssisələri var. Amma şagirdi hansısa məsələyə görə 10-15 gün tədris prosesindən kənarda saxlamaq doğru yanaşma deyil. Bu qərar yalnız Ümumi Pedaqoji Şuranın iclasında qəbul oluna bilər. Yəni şagirdə intizam xarakterli hər hansısa cəza verilməlidirsə, o zaman valideyn dəvət olunmalı və profilaktik söhbət aparılmalıdır. Yalnız ondan sonra şagirdin dərsə buraxılıb buraxılmayacağına dair qərar qəbul olunmalıdır. Bir, iki gün dərsə buraxılmamaq cəza üsuludur. Lakin şagirdi tədris prosesindən 10-15 gün uzaq saxlamaq doğru deyil”.
